3. sæti í Futsal

18.2.2008 | 10:57

5. flokkur KR tók um helgina þátt í úrslitakeppni Íslandsmótisins innanhúss en í ár var í fyrsta skiptið á Íslandi leikið eftir Futsal reglum sem notaðar eru víða um heim.

Við lékum í riðli með Leiftri, Vestfjörum og Gróttu en í hinum riðlinum voru Breiðablik, Keflavík, Sindri og ÍBV. Tvo efstu liðin í hvorum riðli komust svo í undanúrslit.

Fyrstu tveir leikirnir sem voru gegn Vestfjörðum og Leiftri þróuðust mjög svipað, strákarnir spiluðu góða vörn og gáfu fá færi á sér en áttu hinsvegar í vandræðum með að skora enda Futsal boltarnir oft erfiðir við að eiga. Markatalan eftir tvo leiki því 0:0 og 2 stig komin í hús. Síðasta leikurinn í riðlinum var svo gegn Gróttu sem höfðu unnið báða sína leiki og voru því komnir áfram en ljóst var að við þyrftum sigur til að komast í undanúrslitin.

Leikurinn við Gróttu byrjaði svo líkt og hinir tveir - fá marktækifæri og bæði lið spiluðu góðan varnarleik. Staðan 0:0 í hálfleik og ljóst að við þyrftum a.m.k. eitt mark. Því varð lögð meiri áhersla á sóknarleikinn þegar leið á seinni hálfleikinn og uppskárum við mark 3 mínútum fyrir leikslok þegar Tómas skoraði laglega framhjá markmanni Gróttu. Eftir þetta fengum við fleiri færi til að bæta við mörkum en lokatölur 1:0 og ljóst var að við myndum mæta Breiðablik í undanúrslitum en þeir höfðu unnið alla sína leiki til þessa.

Undanúsltaleikurinn gegn Breiðablik byrjaði svo illa. Við lentum 1:0 undir strax í byrjun og fljótlega bættu þeir við öðru marki. Eftir það virtist svo að við værum vaknaðir og byrjuðum að spila fínan fótbolta - sköpuðum okkur nokkur færi en mörkin létu enn á sér standa. Lokatölur 2:0 fyrir Breiðablik sem endaði svo á að vinna mótið taplausir eftir 2:0 sigur á Gróttu í úrslitaleik.

Síðasti leikur okkar í mótinu og jafnframt sá allra besti var svo gegn Keflavík í leik um 3. sætið.
Svo virðist sem losað hafi verið um eitthvað smá stress eftir leikinn við Breiðablik og gegn Keflavík var spilamennskan mjög góð - menn voru tilbúnir að taka boltann niður og spila honum vel á milli sín auk þess sem að allir sýndu frábæra baráttu.
Þetta skilaði sér í góðum 3:1 sigri og 3. sæti í Íslandsmótinu innanhúss 2008 af þeim 30 liðum sem tóku þátt í þessu fyrsta Futsal móti 5. flokks.

Mörk KR í mótinu skoruðu þeir Tómas 2, Júlí og Albert en auk þeirra léku Leifur, Orri, Tryggvi, Eyjólfur, Anton, Bjarki, Elías, Viðar og Baldvin.